Plantun de Prouvènço

Pèr coumpara dos planto d'encò nostre

Coincya monensis subsp. cheiranthos & Plumbago europaea

Coincya monensis subsp. cheiranthos

Brassicaceae Cruciferae

Nom en français : Chou giroflée.

Descripcioun :
Poulit caulet que pòu faire fin qu'à un mètre d'aut. Trachis sus li paret e lis esboudèu di colo prouvençalo sus sòu séusous. Li fueio, proun descoupado soun en rouseto, alor que li tijo soun ramificado. Fai de flour jauno raiado e de boudousco pulèu longo. Lou gènre Coincya se destrìo de Brassica que fai de valvo di tres costo.

Usanço :
Couneissèn pas d'usanço particuliero pèr aquelo planto. Pamens, estènt un caulet, devrié èstre manjadis. Escriéure au site se n'en sabès mai.

Port : Erbo
Taio : 20 à 70 (100) cm
Fueio : rouseto
Tipe bioulougico : Emicriptoufite
Cicle bioulougico : Planto renadivo

Gènre : Coincya
Famiho : Brassicaceae
Famiho classico : Cruciferae

Ordre : Brassicales

Coulour de la flour : Jauno
Petalo : 4
Ø (o loungour) flour : 5 à 6 cm
Flourido : Printems - Estiéu

Sòu : Si
Autour basso e auto : 0 à 2200 m
Aparado : Noun
Mai à avoust

Liò : Paret - Esboudèu - Roucas - Champ
Estànci : Termoumediterran à Aupen
Couroulougi : Ouroufito-Éuroupenco
Ref. sc. : Coincya monensis subsp. cheiranthos (Vill.) Aedo, Leadlay & Muñoz Garm., 1993

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.